गौतम बुद्धको पालाको इनार भेटियो

चितवनको रत्ननगरमा माछापोखरी खन्ने क्रममा पुरानो इनार भेटिएकोे छ । रत्ननगर नगरपालिकाको वडा नम्वर ९ लालपर्सास्थित इन्द्रराज राउतले खेतमा माछापालनका लागि पोखरी खन्ने क्रममा इनार भेटिएको हो । इनार धेरै वर्ष पुरानो हुन सक्ने अनुमान गरिएको छ । माछापोखरीका लागि झण्डै सात मिटर गहिराई खनेर कोदालोले माटो सम्याउने क्रममा इनार भेटिएको बताइएको छ । इनार भेटिए लगतै पोखरी निर्माण कार्य तत्कालका लागि रोकिएको छ । पुरातात्वीक विभागले नै पत्रचार गरेर तत्कालका लागि इनार वरिपरी कुनैपनि संरचना नबनाउन निर्देशन दिएको छ । माछापालनका लागि पोखरी खन्ने क्रममा भेटिएको इनार गौतम बुद्धको पालाको हुन सक्ने विभागले अनुमान गरेको छ । विभागले केहि दिनभित्रै उत्खनन गर्ने बताएको छ । इनार थारु बस्तीमा भेटिएको हो । चितवनको रैथाने बासिन्दाको रुपमा थारुलाई लिने गरिन्छ । यो बस्तीमा एउटा पनि इनार छैन । थारु बस्तीमा पहिला इनारको पानी खाए मान्छे मर्छ भन्ने जनविश्वास थियो ।

الفئة